Speech by Eraj Uzoqov

Date: 19 October 2016
Other languages: English | Русский язык |


Улуу Даражалуу Ага Хан, урматтуу Премьер-министр Сооронбай Жээнбеков мырза, Кыргызстандын, Тажикстандын, Казакстандын Өкмөттөрүнүн өкүлдөрү, дипломатиялык коомчулуктун өкүлдөрү, Ага Хан өнүктүрүү уюмунун мүчөлөрү, кадырлуу меймандар, Университетибиздин мугалимдери жана кызматкерлери жана албетте, менин студент курдаштарым.

Менин Атым Эраж Узоков, 2021-жылы окуусун аяктай турган студенттердин атынан сөз сүйлөө мен үчүн чоң сыймык. 

Алты жума мурун гана Борбордук Азия Университетинин Нарындын тоолорунун арасында жайгашкан биринчи кампусуна келгенбиз. Университеттин сүрөттөрүн интернеттен көргөнүм эсимде, ошондо сүрөттөрдү фотошоп менен жасалган экен деп койгом. Интернеттеги сүрөттөрдү биринчи көрүп баарыбыз ишенген эмеспиз, кантип эле Борбордук Азиянын тоолуу аймактарында ушундай денгээлдеги университет болсун деп. Автобус бул жерге бурулуп, кампуска келген биринчи күн дагы эле эсимде. Университеттин кооздугуна баарыбыз таң калганбыз. Ошол биринчи элести бардыгыбыз өмүр бою сактап калабыз деп мен ишенем.

Борбордук Азияда төрөлүп-өскөндүктөн, аймакты жакшы билем деп ойлойсуң, бирок бул жерге келген соң дагы көп нерсени үйрөнүү зарыл экендигин түшүндүм. Мисалы мени менен бир бөлмөдө жашаган Нурлан Ат-Башыдан келген, бул жерден бир сааттык жол, ал эми мен болсо Душанбеден келгем, бул жерден 24 сааттык жол. Алты жуманын ичинде эле жакшы дос болуп калдык, ал мени өз үйүнө чакырды. Анын үй-бүлөсү мени кыргыз маданияты менен тааныштырып, Борбордук Азиянын мурдатан көрбөгөн жактарын ачып берди.

Кампуста окуп жатып, Кыргызстандан, Тажикстандан, Казакстандан келген, ал турсун Афганистан жана Паскистан сыяктуу башка тоолуу өлкөлөрдөн келген адамдар менен тааныштым. Өзүм Тажикстандык болсом дагы, бул жерде өз өлкөмдүн башка аймактарынан келген мекендештеримди жолуктурам деп ойлогон эмесмин. Курсташтарым гана ар түрдүү мамлекеттерден болбостон, мугалимдерибиз жана Университеттин кызматкерлери дагы дүйнөнүн ар бурчунан келген экен. Алар эң алыскы Канададан, АКШдан, Филиппиндерден, Германиядан, Азербайджандан, Пакистандан тартып, коңшу Тажикстандан жана Казакстандан, ошондой эле Кыргызстандан дагы келишкен. 

Улуу Даражалуу Ага Хан, дүйнө жүзү боюнча плюрализмди жана ар түрдүүлүктү колдоо жаатында көптөгөн жылдар бою талыкпай эмгектенип келесиз, ошондуктан Нарындагы бул кампус сиздин көз карашыңыздын ишке ашуусу деп тааныйм. Бизди курчап турган тоолор ушунчалык кооз жана көркөм, бирок алар Борбордук Азиянын элдерин географиялык жактан жүздөгөн жылдар бою бөлүп келет. Мындай шарт биздин регион үчүн абдан татаал. Бирок БАУга келип, бул чектерге жана тоолордун бийиктигине карабастан билим адамдарды бириктирээрин толугу менен түшүндүк. 

Менин кээ бир группалаштарым жана өзүм шаар жергесинде чоңойгонбуз, албетте тоолуу аймактардагы татаал шарттарды билчүбүз. Бирок алардын тереңдигин БАУ бизге сунуштаган дисциплиналар аралык программасы жана тоолуу аймактарда жашоо мүмкүнчүлүгү аркылуу гана билдик. Мунун бардыгы бизге, жаңы муунга, бул татаал шарттарды кантип Борбордук Азиянын баалуу мүлкүнө айлатабыз деген критикалык түрдө ой жүгүртүүгө себепкер болду. 

Бул жерде бир жарым ай гана болгонубузга карабастан, окуу жана башка чөйрөлөр менен байланыштуу жөндөмдөрүбүз өркүндөгөнүнө күбө болуп жатабыз. Англис тили жана баарлашуу боюнча шыктарыбыз өнүгүп, өз алдынча иштеп, өзүбүзгө ишенимибиз артты жана жашообуздагы ар түрдүү маселелер боюнча көбүрөөк жоопкерчилик тарта баштадык. Биз үчүн жаңы шарттарга көнүү татаал болгону менен, мугалимдер менен студенттердин сабактан тышкаркы жашоосуна жооптуу адамдар тобу тарабынан көрсөтүлгөн колдоо көп жеңилдиктерди берди. 

2021-жылы окуубузду аяктай турган алгачкы студенттер болгондуктан, бул кампустан пайда алуу менен бирге ийиндерибизде өтө чоң жоопкерчилик жүктөлөт. Ар бирибиз бул жерде билим алып, аны кененирээк чөйрөдө колдонуу үчүн жооптубуз. Өз коомдорубузга гана эмес, дүйнө жүзүндөгү бардык адамдарга кызмат кылуу үчүн дагы жооптуубуз. Бул окуу жана жаңы ачылыштар сапарын баштап жатып, Улуу Даражалуу Ага Хан, “дүйнөнүн жараны” деген көз карашыңызга тете болобуз деп  убада беребиз. 

Улуу Даражалуу Ага Хан Сизге жана Университетти негиздеген үч өлкөгө, БАУ аркылуу бизге өнүгүү мүмкүнчүлүгүн ачкандыгыңыздар үчүн терең ыраазычылыгыбызды билдиребиз. Биздикиндей тоолуу аймактар үчүн жасаган жана дагы деле ишке ашырып келе жаткан мүмкүнчүлүктөр үчүн чоң рахматыбызды айтабыз. Урматтуу премьер-министр, беш жыл бою биздин үйүбүз боло турган ушул көркөм жерди бергендигиңиз үчүн терең ыраазычылыгыбызды билдиребиз. Студенттердин атынан, бизге Борбордук Азия Университетинин алгачкы студенттери болуу үчүн жардам көрсөткөн адамдардын бардыгына рахмат айтып, таазим кылам. 

Бул тоолор, биздин үйүбүз аталган жер сиздердин жүрөгүңүздөрдө жагымдуу сезим калтырат деп ишенебиз жана да беш жылдан кийин бүтүрүү аземинде кайрадан көрүшкөнчө!

Рахмат!